Фото: AP

АҚШ президенти Дональд Трамп «Трамп карталари»га ариза топширувчилар учун махсус веб-сайт ишга туширилганини маълум қилди. Бу ҳужжат – 5 миллион долларга АҚШда яшаш учун рухсатнома олиш имкониятини тақдим этади.

Журналистларнинг фикрича, TrumpCard.gov сайти доимий яшаш ва кейинчалик фуқароликни олишни хоҳловчи потенциал мурожаат этувчилар учун мўлжалланган. Портал фойдаланувчилардан исм-шарифи, яшаш ҳудуди ва электрон почта манзилини қолдиришни, шунингдек, жисмоний шахс сифатида ёки компания номидан ариза топшираётганини кўрсатишни сўрайди. Трамп жамоасининг таъкидлашича, рўйхатга олишнинг очилиши бу фақат биринчи босқич ҳисобланади.

Оқ уй раҳбари ўзининг «Truth Social» саҳифасида «минглаб одамлар қўнғироқ қилиб, дунёдаги энг буюк мамлакат ва энг катта бозорга қандай киришни сўраяпти», дея ёзди. У, шу ўринда, «кутиш рўйхати аллақачон очиқ» эканлигини билдирди.

«Олтин карта» ғоясини Трамп шу йилнинг февраль ойида айтган эди. Унинг сўзларига кўра, АҚШ катта маблағ сарфлаш, солиқ тўлаш ва иш ўринлари яратиш имкониятига эга бўлган бой ва муваффақиятли одамларга доимий яшаш жойини тақдим этади.

Шу йилнинг апрель ойида Трамп портрети туширилган олтин рангли пластик ҳужжат — карта намунасини кўрсатган эди. Янги дастур АҚШ иқтисодиётига 800 минг доллардан 1,05 миллион долларгача сармоя киритишни назарда тутувчи амалдаги EB-5 виза ўрнини босиши мумкин.

Номзодларга 5 миллион доллар тўловдан ташқари қандай қўшимча талаблар қўйилиши ҳозирча номаълум. Трамп вакиллари фақатгина ариза берувчилар текширувдан ўтишини қайд этишди.

АҚШнинг амалдаги қонунчилигига кўра, инглиз тилида бошланғич билимларга, намунали одоб-аҳлоққа эга ва АҚШ Конституциясига содиқ доимий яшаш ҳуқуқига эга шахслар беш йилдан сўнг фуқароликка ариза беришлари мумкин.

Шу йилнинг январь ойининг иккинчи ярмида Трамп АҚШда туғилиш орқали фуқароликка эга бўлиш ҳуқуқини чекловчи фармонни имзолаганди. Унинг сўзларига кўра, АҚШ туғилиш ҳуқуқи орқали фуқароликни олиш қоидалари амалда дунёдаги ягона давлат бўлган.