Фото: inbusiness.kz

Ўзбекистон Республикаси Президенти Шавкат Мирзиёевнинг «Ўзбекистон Республикасида туризм инфратузилмасини яхшилаш ва хорижий туристлар оқимини янада оширишга қаратилган қўшимча чора-тадбирлар тўғрисида»ги Фармони қабул қилинди.

Фармонга кўра, Ўзбекистоннинг туризм маҳсулотини халқаро ва ички туризм бозорларида тарғиб қилиш, саёҳат ва дам олиш учун хавфсиз мамлакат сифатидаги имижини янада мустаҳкамлашга қаратилган янги миллий туризм бренди (танитиш белгиси) яратилади.

Қайд этилишича, туризм қўмитаси 2024 йил 1 октябргача янги миллий туризм брендини яратиш учун танлов ўтказади. Шунингдек, 2024 йил Халқаро туризм куни доирасида биринчи глобал сайёҳлик медиа-кампусини ташкил қилиниши, 2024–2025 йилларда аудиторияси 10 миллиондан ортиқ бўлган 50 нафаргача хорижий журналист, блогер, влогер ва инфлюэнсерларни жалб қилиниши ҳам ушбу фармонга мувофиқ амалга оширилади.

Шунингдек, 2025 йил 1 январдан камида 100 нафар хорижий иштирокчиси бўлган 3 кундан кам бўлмаган бизнес тадбирларни Ўзбекистон ҳудудида ташкил қилган тадбиркорлар 2028 йил 1 январгача ушбу бизнес тадбирларни ташкил қилишдан олинган даромаддан олинган фойда солиғини ушбу солиқ бўйича белгиланган солиқ ставкасига нисбатан 50 фоизга камайтирилган солиқ ставкаси бўйича тўлайди.

Аввалроқ, энергетика соҳасида кадрларни қайта тайёрлаш ва малакасини ошириш маркази ташкил этилиши ҳақида хабар берилганди.