АҚШ пойтахтида ҳар йили анъанавий тарзда ўтказиб келинаётган “Embassy Chef Challenge“ гастрономик фестивалида ўзбек миллий таомлари тақдимоти бўлиб ўтди.

Тадбир Вашингтонда аккредитациядан ўтган дипломатик миссиялар, маданий-гуманитар, таълим, жамоат ташкилотлари ва АҚШ бизнес доира вакилларини бир майдонга жамлади.

Фестиваль доирасида “Пазандачилик дипломатияси оқшоми” мавзусида ўтказилган таомлар намойиши дипломатик миссияларга ўзларининг миллий ошхоналари салоҳиятини намойиш этиш имкониятини берди.

Мамлакатимиз элчихонаси вакиллари Ўзбекистоннинг туристик ва гастрономик салоҳияти, маданий урф-одатлармиз ва ўзбек миллий ошхонасининг асосий таомларини тақдим этишди.

Ўзбекистон стенди фестиваль ташкилотчилари ва меҳмонларида катта таассурот қолдирди. Хусусан, махсус тайёрланган тўй палови меҳмонларнинг алоҳида қизиқишига сабаб бўлди. Шунингдек, иштирокчилар Қўқоннинг машҳур ҳолваларини татиб кўришди ва улар ушбу миллий ширинликларни сотиб олиш истакларини билдирдилар. Меҳмонларга ўзбек миллий таомлари ва Ўзбекистондаги гастрономик туризм ҳақида батафсил маълумот берилди.

Тадбир доирасида, шунингдек, ўзбек халқ амалий санъати ва миллий ҳунармандчилик маҳсулотлари кўргазмаси ҳам ташкил этилди.