2020-yilda Los-Anjelesda “Oskar” mukofotining 92-taqdirlash marosimi boʻlib oʻtadi. Unda Oʻzbekistondan ham nomzod film taqdim etiladi. Filmni Oʻzbekiston Oskar qoʻmitasi tanlaydi. Rejissyor Zulfiqor Musoqov Facebook tarmogʻida qoʻmita aʼzolari tarkibini tanqid qildi.

Zulfiqor Musoqov nega norozi?

“Shu tarkibdagi insonlarning beshtasini ancha yillardan beri taniyman – kino sanʼatiga juda har xil miqdorda, ozmi-koʻpmi oʻz kasbi bilan hissa qoʻshib kelgan insonlar. Lekin nimaga bu tanlovchilarni ichida bironta buyuk yozuvchilar, rejissyorlar, aktyorlar, kinoshunoslar yoʻq? Hammasi boshliq va boshliqchalar? Qoʻshni davlatlarda tanlov kengashi soni 30dan ortiq. Nimaga davlat miqyosidagi muhim madaniy va siyosiy ahamiyatga ega boʻlgan bu tadbir oshkoralik bilan hal etilmadi?”, deydi Musoqov oʻz izohida.

Komissiya tarkibidan taajjubda

Zulfiqor Musoqov komissiya aʼzolari Oybek Abdushukurov va Sayyora Xudoyberdiyevalar nima uchun bu tarkibga kiritilganidan taajjubda ekanligini yozgan.

“Oybek Abdushukurov va Sayyora Xudoyberdiyevalar kimlar? Bu ikki inson oʻzbek kinosiga qanday ulkan hissa qoʻshgan?”, deydi rejissyor.

Saralash jarayoni oshkora oʻtmaganini tanqid qildi

Rejissyor butun dunyoda hatto “Oskar”ning vatanida ham filmlarni saralash qoʻmitasi aʼzolari adolatli shaklda tuzilishini, Oʻzbekistonda esa bu jarayon oshkora boʻlib oʻtmaganini tanqid qilgan.

"Saralash guruhi tanish-bilishchilikka berilmasligiga ishonchimiz uncha emas”

“Sizni bu masalada qanday manfaatingiz bor? degan savolga ochiq-oydin javob beraman: hamma kinoni yaratgan insonlar kabi bizni ijodiy guruh ham filmimiz shu katta sovringa nomzod boʻlishini istardik. Lekin saralash guruhi didvozlikka, guruhvozlikka, gʻirromlikka, tanish-bilishchilikka berilmasligiga ishonchimiz uncha emas”, degan Zulfiqor Musoqov.

Maʼlumot uchun Oʻzbekiston Oskar qoʻmitasi aʼzolari tarkibiga:

Furqat Zokirov – “Oʻzbekkino” MA sobiq bosh direktori (qoʻmita raisi)

Fotih Jalolov – “Oʻzbekfilm” DUK direktori, Oʻzbekistonda xizmat koʻrsatgan artist 

Bahodir Odilov – “Hujjatli va xronikal filmlar kinostudiyasi” DUK direktori, rejissyor,

Matyoqub Matchonov – Oʻzbekiston kinematografchilari uyushmasi raisi, aktyor, Oʻzbekistonda xizmat koʻrsatgan artist

Jahongir Qosimov – Oʻzbekiston sanʼat arbobi

Sayyora Xudoyberdiyeva – Oʻzbekiston kinematografiyasini rivojlantirish markazi direktori

Oybek Abdushukurov – Yosh kinoijodkorlar kengashi raisi, “PROlogue” xalqaro kinofestivali direktori, prodyuser kiritilgan.