Adliya vazirligi tomonidan Zomin qozon patiri geografik koʻrsatkich sifatida roʻyxatdan oʻtkazildi. Bu haqda vazirlik axborot xizmati xabar berdi.

Qayd etilishicha, endi “Zomin qozon patiri” Oʻzbekiston davlat reyestrida 20-geografik koʻrsatkich sifatida roʻyxatdan oʻtgan boʻlib, uning nomi, sifati va kelib chiqish manbai qonuniy himoyaga ega boʻladi.

“Bu hududiy brendni rivojlantirish, mahalliy ishlab chiqaruvchilarni qoʻllab-quvvatlash va isteʼmolchilarga sifatli, original mahsulotni taqdim etishga xizmat qiladi”, deyiladi xabarda.

Taʼkidlash kerakki, Zomin qozon patiri – Jizzax viloyatining Zomin tumanida qadimdan tayyorlanadigan non mahsuloti boʻlib, alohida qorilgan xamir, mahalliy sut va sariyogʻ bilan qozonda pishiriladi. U oʻzining noyob taʼmi va sifat xususiyatlari bilan ajralib turadi.

Geografik koʻrsatkich – bu mahsulotning maʼlum hududga xosligini va sifatini huquqiy jihatdan himoya qiluvchi belgidir. U mahsulotning kelib chiqish joyini, anʼanaviy retseptini va oʻziga xos xususiyatlarini davlat darajasida kafolatlaydi.

Eslatib oʻtamiz, avvalroq “Samarqand noʻxat shoʻragi” geografik koʻrsatkich sifatida davlat roʻyxatidan oʻtkazilgani haqida xabar berilgan edi.