Maymun chechagi virusidan eng koʻp Yevropa aholisi aziyat chekmoqda. Hozirgacha bu yerda roʻyxatga olingan bemorlar soni dunyo boʻyicha tasdiqlangan jami koʻrsatkichning qariyb 90 foiziga teng. Xususan, mazkur xavfli infeksiya qitʼaning 31 mamlakatida qayd etilgan.

Shu bois Jahon sogʻliqni saqlash tashkilotining Yevropa mintaqaviy byurosi direktori Xans Klyuge hukumatlarni kasallikka qarshi oʻzaro saʼy-harakatlarni birlashtirishga chaqirdi.

JSST vakilining taʼkidlashicha, shu kunga qadar maymun chechagidan Yevropada oʻlim holatlari kuzatilgani yoʻq. Ammo bu xotirjamlik uchun asos boʻlolmaydi.

Chunki toshma, isitma, charchoq, bosh, tomoq va mushaklar ogʻrigʻi, qusish, diareya kabi belgilar bilan namoyon boʻlayotgan mazkur xastalik geografiyasi kun sayin kengayib boryapti.

Bundan tashqari, Yevropada keyingi bir oy ichida koronavirus infeksiyasini yuqtirish holatlari ham uch barobar oshgan.

Ayni paytda “koʻhna qitʼa”ning 53 davlatida kuniga 500 ming nafarga yaqin kishida COVID-19 aniqlanmoqda. Shu bilan birga, oʻlim koʻrsatkichlari ham 2020-yil yoz mavsumi darajasiga yaqinlashdi: kuniga qariyb 500 kishi koronavirus tufayli hayotdan koʻz yumyapti.

Shu sababli JSST aholi oʻz vaqtida, toʻliq bosqichda emlanishi, qolaversa, jamoat joylarida niqob taqib yurishi zarur, degan xulosada.