Illyustrativ foto

Uchquduq tumanida xususiy maktabgacha taʼlim muassasasi ochib, noqonuniy daromad topmoqchi boʻlganlarning nayranglari fosh etildi.

Uchquduqlik tadbirkor Gullola Xoʻjayeva (maqoladagi barcha ism-shariflar oʻzgartirilgan) tumanda xususiy bogʻcha faoliyatini yoʻlga qoʻyishni niyat tutib, hujjatlarni rasmiylashtirish bilan birga muassasa uchun kadrlar topish ishlarini ham birvarakayiga boshlab yubordi.

- Ish axtarib yurgan tanishlaring boʻlsa “gaplashaver”, faqat “ishonchli” boʻlsin, - dedi u tanishi Gulasalga.

Shu kuni ikkovlon gumashtalar hali qurilishi rejalashtirilayotgan muassasada yaratilajak 16 ta ish oʻrnining “stavka”larini oʻrnatib oldilar. Unga koʻra oliy maʼlumotli tarbiyachilar “bepul”, oʻrta maʼlumotli yordamchi tarbiyachi, oshpaz shunga oʻxshagan texnik xodimlarning “stavka”si 3 milliondan 4 million soʻmgacha belgilandi.

Bandlik muammosi Uchquduqqa ham daxldor. Tumanning oʻnlab yoshlari qatori Xurshida ham ish axtarayotgan edi.

- Senbop ish bor, xarajatidan qochmasang boʻldi, - dedi unga Gulasal. – 4 million soʻm ketadi. Oliy maʼlumotli boʻlganingda boshqa gap edi.

Savdo 3 million 800 ming soʻmga pishib, pul ertaga keltirilishiga kelishildi. Biroq Gullolaning sabri chidamadi.

- Bugun kechqurun kelishilgan pulni olib kelmasang, oʻrningga boshqa odam olarkan, — dedi “shart”ni Xurshidaga yetkazgan Gulasal.

Xurshida huquq-tartibot idoralariga murojaat qilgan edi. “Qadrdonlar” ashyoviy dalillar bilan qoʻlga olindi.

Ularning har ikkalasiga jinoyat ishlari boʻyicha Uchquduq tuman sudi hukmi bilan eng kam oylik ish haqining 40-50 baravari miqdorida jarima jazosi tayinlandi.

Temur ESHBOYEV,
“Xalq soʻzi” muxbiri.