Shvetsiyaning Malmyo shahrida oʻtkazilgan yirik xalqaro shaxmat turniri oʻz yakuniga yetdi. Aylana tizimida boʻlib oʻtgan mazkur musobaqada Oʻzbekiston sharafini grossmeyster Javohir Sindarov muvaffaqiyatli himoya qildi.

Mamlakatimizning ikkinchi raqamli shaxmatchisi yetti nafar kuchli raqiblari bilan sovrinli oʻrinlar uchun kurash olib bordi.

Kecha boʻlib oʻtgan 7-tur bahsida Sindarov qora donalarda ukrainalik shaxmat afsonasi Vasiliy Ivanchukka qarshi bahs olib bordi va oʻyinni durang bilan yakunladi.

Ushbu natija bilan Javohirning ochkolar soni 4,5 taga yetdi. Paralel tarzda, ikkinchi oʻrinda borayotgan turkiyalik Yagiz Erdogmus ham oʻz raqibi, niderlandiyalik Ervin LʼAmi bilan durang oʻynadi. Natijada, turnirda Javohir Sindarovni ochkolar boʻyicha quvib yetishga hech bir raqibda imkon qolmadi.

Shunday qilib, Javohir Sindarov Malmyoda oʻtayotgan nufuzli xalqaro turnirda chempionlikni qoʻlga kiritdi. Bu natija yosh grossmeysterimiz uchun navbatdagi muhim yutuq boʻlib, Oʻzbekiston shaxmat maktabining yuksak salohiyatini yana bir bor isbotladi.