Jahon sogʻliqni saqlash tashkiloti Xitoyda koronavirus tarqalishini xalqaro favqulodda holat deb tan oldi.

“Men koronavirusning global tarqalishi sababli xalqaro sogʻliqni saqlash favqulodda holatini eʼlon qilmoqdaman”, dedi JSST Bosh direktori Tedros Gebreyesus Jenevada tashkilotning favqulodda qoʻmitasi yigʻilishidan keyin.

JSST tasnifida ushbu holatlar “boshqa davlatlar uchun sogʻliq uchun xavf tugʻdiradigan favqulodda hodisalar” deb hisoblanadi va “xalqaro hamjamiyat tomonidan muvofiqlashtirilgan choralarni talab qilishi mumkin”.

Biroq, tashkilot virus bilan bogʻliq holda tovarlar va odamlarning harakatlanishiga cheklovlar joriy qilishni tavsiya etmaydi.

Jahon Sogʻliqni Saqlash Tashkilotining bayonotiga koʻra, agar dunyo mamlakatlari virusni erta aniqlash, bemorlarni izolyatsiya qilish va ularning aloqalarini kuzatish choralarini koʻrsalar, koronavirusning tarqalishini toʻxtatish mumkin.

Xitoyda koronavirusni yuqtirib olganlar soni 7818 (30-yanvar kuni holatiga koʻra) kishiga yetgan, vafot etganlar soni 200 nafardan ortdi. JSST maʼlumotlariga koʻra, Xitoydan tashqarida, 20 mamlakatda yuqtirish holati qayd etilgan. Xitoydan tashqarida qurbonlar yoʻq.

Bugunga qadar virus bilan bogʻliq holatlar Avstraliya, Fransiya, Germaniya, Finlyandiya, Nepal, Vyetnam, Singapur, Saudiya Arabistoni, Birlashgan Arab Amirliklari, Janubiy Koreya, Tailand, Yaponiya, AQSH, Kanada, Janubiy Afrika Respublikasi, Hindiston va Filippinda aniqlangani maʼlum qilingan edi.