Yoshlar oyligi doirasida 29-iyun kuni dunyoga mashhur futbol yulduzlari Oʻzbekistonga keladi. Bu haqda Oʻzbekiston futbol assosiasiyasi matbuot va ommaviy axborot vositalari departamenti direktori Davron Fayziyev maʼlum qildi.

Tashrif buyuruvchi futbolchilarning eng mashhuri shubhasiz Dida (Jesus Silva)dir. Mashhur darvozabon Braziliya terma jamoasining sobiq aʼzosi, jahon chempioni, ikki karra “Milan” klubi bilan UYEFA chempionlar ligasi gʻolibi hisoblanadi.

Roʻyxatda yana bir “Real Madrid” va “Milan” jamoalarining sobiq futbolchisi Kristian Panuchchi ham bor. Italiya terma jamoasining sobiq himoyachisi klublar safida ikki marta UYEFA chempionlar ligasi gʻolibi boʻlgan.

Italiya terma jamoasining sobiq aʼzosi Kristian Zakkardo va Braziliya terma jamoasining sobiq aʼzosi Serjinyo (Serjio Klaudio dos Santos) ham mamlakatimizga keladi.

Maʼlumot uchun, Zakkardo oʻng qanot himoyachisi boʻlib, 2006-yilda terma jamoasi bilan jahon chempioni boʻlgan. Serjinyoda esa “Jahon chempionati kubogi”dan tashqari “Milan” klubi bilan ikkita UYEFA chempionlar ligasi gʻolibligi ham bor.

“29-iyun kuni soat 15:00da Yoshlar ijod saroyida boʻladigan uchrashuvda futbol tarixi, buguni va kelajak istiqbollari, Oʻzbekistonda sohadagi islohotlar hamda sportchilarimizning muvaffaqiyatlari haqida suhbat boʻladi”, deydi Fayziyev oʻz sahifasida qoldirgan postida.