Foto: Milliy olimpiya qoʻmitasi

Toshkentda qilichbozlik boʻyicha oʻsmirlar va yoshlar oʻrtasidagi Osiyo chempionati oʻz yakuniga yetdi. 8 kun davom etgan musobaqani yoshlar oʻrtasidagi jamoaviy dasturlar yakunlab berdi.

Ahamiyatlisi, oʻsmirlarimiz musobaqa doirasida 12 ta medal jamgʻarishga erishgan boʻlsalar, yoshlarimiz bu koʻrsatkichni uchtaga yaxshilashga erishishdi. Bugungi bahslarda qayd etilgan natijalarga toʻxtaladigan boʻlsak, barcha jamoalarni magʻlub etgan shpagachi qizlarimiz oltin, finalda biroz omad yetishmagan rapirachi yigitlarimiz kumush medalga sazovor boʻlishdi.

Qilichbozlik boʻyicha yoshlar oʻrtasidagi OCH.
Qizlar, Shpaga:
1. Oʻzbekiston
2. Hindiston
3. Qozogʻiston

Qizlar, rapira:
1. Gonkong
2. Qozogʻiston
3. BAA

Yigitlar, rapira:
1. Gonkong
2. Oʻzbekiston
3. Hindiston

Yakunda 5 ta oltin, 3 ta kumush va 7 ta bronza medallarini jamgʻargan yoshlarimiz umumjamoa hisobida qitʼa birinchiligini ikkinchi oʻrinda yakunlashdi. Bu borada birinchi oʻrin gonkonglik qilichbozlarga nasib etdi. Hamyurtlarimiz qoʻlga kiritgan oltin medallar soni teng, faqat kumush medallar soni boʻyicha kichik ustunlik sharqiy Osiyo jamoasini peshqadamga aylantirdi.

Medallar jamgʻarish boʻyicha kuchli uchlik:
1. Gonkong – 5-4-4
2. Oʻzbekiston – 5-3-7
3. Qozogʻiston – 1-3-2

Qayd etish joiz, oʻsmirlar va yoshlar jamoalarimiz bu bilan Osiyo chempionatlarida oʻz tarixidagi eng yaxshi natijalarini qayd etdilar. Oʻzbekiston Milliy Olimpiya qoʻmitasi bunday ajoyib koʻrsatkich bilan Oʻzbekiston qilichbozlik federatsiyasi, sportchi va murabbiylarimizni samimiy muborakbod etadi.