Belarusning Brest shahrida zamonaviy beshkurashning ikkikurash va uchkurash yoʻnalishlari boʻyicha xalqaro musobaqa boʻlib oʻtdi. Unda U-11, U-13, U-15, U-17 yosh toifalaridagi sportchilar ishtirok etishdi.

Oʻzbekiston zamonaviy beshkurash federatsiyasi matbuot xizmatining maʼlum qilishicha, musobaqada ishtirok etish uchun koʻplab davlatlardan tashrif buyurgan 120 nafar yoshlar orasida hamyurtlarimiz ham oʻz omadlarini sinab koʻrishdi.

Avval xabar berganimizdek, ayni paytda terma jamoamiz vakillari 10-fevraldan boshlab ushbu mamlakatda xalqaro oʻquv-mashgʻulot yigʻinida boʻlib turibdi. Yigʻin doirasida yoshlarimiz belaruslik sportchilar bilan birga oʻz mahoratlarini oshirish imkoniyatiga ega boʻlishmoqda.

Musobaqa yakunida yoshlarimizning natijasi ancha oʻsganini eʼtirof etish oʻrinli. Ayniqsa, 15 yoshgacha boʻlgan oʻsmirlar toifasida qatnashgan Kira Soy oʻz tengqurlari orasida uchinchi oʻrinni qoʻlga kiritgani murabbiylarimizda iliq taassurot qoldirdi. Yana bir hamyurtimiz Sherjon Ahmedov murosasiz raqobatda toʻrtinchi natijani qayd etdi. Qolgan vakillarimiz garchi sovrinli oʻrinlarga kira ololmagan boʻlsalar ham, xalqaro musobaqada ishtirok etish orqali oʻz mahoratlarini yanada oshirishga erishdilar.