Davlat xavfsizlik xizmati Namangan viloyati boshqarmasi, viloyat prokuraturasi hamda departament xodimlari tomonidan oʻtkazilgan tezkor tadbirda viloyat qishloq xoʻjaligi boshqarmasida yuqori lavozimda ishlovchi shaxs Chortoq tumanida istiqomat qiluvchi xususiy tadbirkorga bogʻdorchilik bilan shugʻullanishi uchun Yangiqoʻrgʻon tumani hududidan 10 gektar yer maydoni ajratilishi boʻyicha tuman hokimining qarorini chiqartirib berishni vaʼda qilib, oʻzi faoliyat yurituvchi boshqarmaning maʼmuriy binosi yonida 10 ming AQSH dollari olgan vaqtida ashyoviy dalillar bilan ushlandi.

Tergovga qadar tekshiruv harakatlari davomida, u ushbu pullarni Yangiqoʻrgʻon tumani hokimi oʻrinbosariga berishi kerakligi maʼlum boʻlib, tezkor tadbir davom ettirildi va mazkur mansabdor shaxs ham Namangan shahrida 10 ming dollarni olgan vaqtida ushlandi.

Tuman hokimligi huzuridagi yer uchastkalarini berish masalalarini koʻrib chiquvchi komissiya aʼzosi sifatidagi vakolatlaridan foydalanishni rejalashtirgan ushbu yuqori lavozimli shaxs boshqa MCHJga qarashli yer maydonidan 10 gektarini ajratib berishni maqsad qilgan.