Farhod ESONOV/“Xalq soʻzi”. Termiz tumani tibbiyot birlashmasi “Yangiariq” filialini yangidan qurishga 15,5 milliard soʻm mablagʻ sarflandi. Bu muassasa binosi 1972-yilda qurilgan boʻlib, tibbiy asbob-uskunalari ham maʼnan eskirgan edi. Ushbu holat koʻplab noqulayliklarni tugʻdirib kelayotgandi. Prezidentimizning “2024 — 2026-yillarda Oʻzbekiston Respublikasining ijtimoiy va ishlab chiqarish infratuzilmasini rivojlantirish chora-tadbirlari toʻgʻrisida»gi qarori doirasida “Yangiariq” filiali tubdan rekonstruksiya qilindi.

Ushbu loyihaga sarflangan 15,5 milliard soʻm mablagʻ evaziga 20 oʻrinli xirurgiya, 40 oʻrinli terapiya va 20 oʻrinli akusher-ginekologiya boʻlimlari uchun binolar qurilib, zamonaviy tibbiy asbob-uskuna bilan jihozlandi. Shuningdek, 40 oʻrinli tugʻruq boʻlimi va 100 qatnovga moʻljallangan koʻp tarmoqli markaziy poliklinika binolari toʻliq taʼmirlandi.

Tibbiyot muassasasining tantanali ochilish marosimida Surxondaryo viloyati hokimi Ulugʻbek Qosimov ishtirok etdi.