Vengriya tashqi ishlar va tashqi iqtisodiy aloqalar vaziri Péter Siyarto mamlakat hukumati Ukrainaning Yevropa Ittifoqiga aʼzolik boʻyicha muzokaralarini boshlashiga ruxsat bermasligini maʼlum qildi, deb xabar berdi TASS.

— Shuni aniq bilishingiz mumkinki, men tashqi ishlar vaziri, Viktor Orban esa bosh vazir boʻlgan bir paytda, Ukraina bilan Yevropa Ittifoqiga kirish muzokaralari boshlanmaydi, — dedi Siyarto parlamentdagi chiqishida.

Uning soʻzlariga koʻra, hukumat bu masalada oʻz fikrini oʻzgartirmagan, garchi boshqa davlatlar jiddiy bosim oʻtkazishga uringan boʻlsa ham.

— Ukrainani Yevropa Ittifoqiga qabul qilish, hatto faqat mazmunli muzokaralar boshlangan taqdirda ham, Yevropa uchun xavf tugʻdiradi, chunki bu urush va Yevropa xalqlarining moliyaviy yoʻqotishlariga olib keladi. Ukrainani aʼzolikka qabul qilish bizning xavfsizligimiz, iqtisodiyotimiz va mehnat bozorimiz uchun tahdiddir. Bugungi kunda Ukrainani Yevropa Ittifoqiga qabul qilish boʻyicha mazmunli muzokaralarning boshlanmaganiga sabab — Vengriya bunga qarshi ekanligi, yaʼni veto qoʻyayotganidadir. Bosh vazir Yevropa Kengashi yigʻilishlarida, men esa Tashqi ishlar kengashida doimo bu masalaga eʼtibor qaratamiz va shuning uchun ham muzokaralar hanuz boshlangani yoʻq, — dedi Siyarto.

Eslatib oʻtamiz, Vengriya hukumati avval ham Ukrainani Yevropa Ittifoqiga shoshilinch qabul qilishga qarshi ekanini bir necha bor maʼlum qilgan. Budapesht bu jarayon Yevropa iqtisodiyotini izdan chiqarishi va Rossiya bilan bevosita qurolli toʻqnashuvga olib kelishi mumkinligini taʼkidlab keladi.