Saminjon HUSANOV/“Xalq soʻzi”. Oramizda shunday insonlar borki, ular oʻzlarining insoniylik fazilatlari, olijanob xislatlari bilan boshqalarga ibrat boʻladi. Baliqchi tumanidagi “Matonat” mahallasida yashovchi Yoqutxon Abdullayeva shular jumlasidan. 70 yoshni qarshilagan onaxon muborak Umra ziyoratini amalga oshirishni niyat qilgandi. Safar oldidan kutilmagan xayrli ishga qoʻl urdi.

— Ulugʻlar aytganidek, kitob barcha bunyodkorlik, yaratuvchilik va aql-idrok, ilm-u donishmandlikning asosi. Hayotni oʻrgatuvchi beminnat murabbiy, — deydi Yoqutxon aya. — Bugungi axborot asrining ilgʻor texnologiyalari hayotimizga shiddat bilan kirib kelmoqda. Ammo farzandlarimizni kitob mutolaasiga oʻrgatish lozim. Bu boradagi savobli ishlarni eng avvalo maktabdan boshlash kerak.

Ismiga munosib onaxon Umra ziyorati uchun toʻplagan mablagʻiga 250 dona kitob sotib oldi. Uni tumandagi 17-umumtaʼlim maktabining kutubxonasiga sovgʻa qildi

Aslida savob olish qiyinmas, buning uchun xohishning oʻzi kifoya. Yaxshilikning esa katta-kichigi boʻlmaydi. Yoqutxon Abdullayeva boshlagan tashabbus barchaga ibrat boʻladi, degan umiddamiz.