Foto: Videodan kadr

Jinoyat ishlari boʻyicha Jomboy tuman sudida Ukrainadagi urushda qatnashgan Oʻzbekiston fuqarosiga nisbatan jinoiy ish koʻrib chiqildi. Bu haqda “Zamon” dasturida xabar berildi.

Maʼlum boʻlishicha, sudlanuvchi 2023-yilda Sankt-Peterburg shahrida ishlayotgan vaqtida Oʻzbekiston Respublikasi fuqarosi boʻla turib, moddiy manfaatdorlik evaziga Rossiya Federatsiyasi qurolli kuchlari safiga yollangan.

2023-yil oktyabr oyida sodir boʻlgan turli hujumlar oqibatida yaralangan shaxs Oʻzbekistonga qaytgan. Unga tegishli telefon tekshirilganda, Rossiya Federatsiyasi qurolli kuchlari safiga ishga kirgani boʻyicha harbiy guvohnoma, Mudofaa vazirligiga tegishli harbiy gospitalda jarohat olgani boʻyicha maʼlumotnoma hamda RF fuqaroligi pasporti aks etgan fotosuratlar topilgan.

Sudlanuvchi Jinoyat kodeksining 154−1-moddasi (Chet davlatlarning harbiy xizmatiga, xavfsizlik, politsiya, harbiy adliya organlari yoki shunga oʻxshash boshqa organlariga xizmatga kirish, yollanish) koʻrsatilgan jinoyatni sodir etganlikda aybli deb topilib, kodeksning 57-moddasi (Yengilroq jazo tayinlash) qoʻllangan holda uch yilga ozodlikdan mahrum etildi. Jazo umumiy tartibli koloniyada oʻtalishi belgilandi.