Shu yilning 24-iyun kuni Qoʻqon shahrida boʻlib oʻtadigan Turkiy tilli davlatlar hamkorlik kengashi turizm vazirlarining oltinchi yigʻilishiga Turkiya, Qirgʻiziston, Qozogʻiston, Ozarbayjon kabi mamlakatlardan tashrif buyurgan delegatsiya aʼzolari uchun bugun Fargʻona viloyati boʻylab sayohat tashkil etildi.

Mehmonlar dastlab ipakchilar shahri Margʻilondagi Hunarmandlar markazida boʻlishdi.Bu yerda qoʻli va qalbi gul chevarlar tomonidan toʻqiladigan milliy hunarmandchilik mahsulotlari barchada unutilmas taassurotlar qoldirdi.

Ikki qavatli markazda 200 dan ortiq turdagi atlas va adras toʻqish, gilamchilik, tikuvchilik, hunarmandchilik mahsulotlari ishlab chiqarish yoʻlga qoʻyilgan boʻlib, mehmonlar atlas, adras, shoyi, baxmal, beqasam matolar toʻqish jarayonini bevosita kuzatish imkoniga ega boʻlishdi.

Shuningdek, tadbir qatnashchilari Rishton shahridagi xalqaro kulolchilik markazi faoliyati bilan ham yaqindan tanishdilar. Rishtonlik mashhur kulollar Alisher Nazirov, Sharofiddin Yusupov boshchiligida mehmonlar uchun oddiy loydan moʻjiza – sanʼat asari yaratilishi jarayoni bilan bogʻliq mahorat darslari oʻtkazildi.

— Taassurotlar bir olam, — deydi Vengriya turizm agentligi dastur direktori Marta Fazekas. — Fargʻona tabiati, mehmondoʻst va samimiy insonlari, qoʻli gul hunarmandlari, kulollari mehnatiga tasanno. Yurtingizda turizmni jadal rivojlanishi uchun barcha sharoitlar muhayyo. Ishonamanki, jannatmakon diyor yaqin yillarda dunyo sayyohlik markazlaridan biriga aylanadi.

Botir Madiyorov,
“Xalq soʻzi”