Bosh prokuratura huzuridagi Departamentning Yangiyoʻl shahri boʻlimi xodimlari tomonidan tezkor tadbir oʻtkazildi, deb xabar bermoqda Iqtisodiy jinoyatlarga qarshi kurashish departamenti.

Unda aytilishicha, oʻtkazilgan tergovga qadar tekshiruv davomida “M.M.” MCHJ ish boshqaruvchisi Sh.R. “Turkiston” MFY hududidagi savdo doʻkonida tijorat maqsadida umumiy foydalanishdagi elektr tarmogʻiga toʻgʻridan-toʻgʻri ulanib, 419,8 million soʻmlik elektr energiyasidan noqonuniy foydalangani fosh qilingan.

Shu kabi yana bir holat departamentning Mirzo Ulugʻbek tumani boʻlimi xodimlari tomonidan oʻtkazilgan tergovga qadar tekshiruvda ham aniqlangan.

Unga koʻra, “X.K.” MCHJ boshqaruv servis kompaniyasi masʼul shaxslari va boshqalar koʻp qavatli turar-joy binosida tijorat maqsadida umumiy foydalanishdagi elektr tarmogʻiga oʻzboshimchalik bilan ulanib, 235,5 million soʻmlik elektr energiyasidan noqonuniy foydalangani fosh etilgan.

Hozirda mazkur holatlar yuzasidan Jinoyat kodeksining 169-moddasi (oʻgʻrilik) bilan jinoyat ishlari qoʻzgʻatilib, tergov harakatlari boshlab yuborilgan.