Toshkent viloyati Ohangaron tumanida yoʻl harakati xavfsizligi xizmatiga tegishli patrul avtomobili ishtirokida yoʻl-transport hodisasi roʻy berdi. Viloyat IIBB YHXB mazkur holat yuzasidan maʼlumot berdi.

Qayd etilishicha, bugun, 23-iyul kuni soat 05:00 larda Ohangaron tumani hududidan oʻtgan A373 “Toshkent-Oʻsh” avtomobil yoʻlining 39-kilometrida “Gentra” va “Cobalt” rusumli transport vositalari ishtirokida YTH yuz bergan.

Voqea sodir boʻlgan joyga YHXX xodimlari “Lacetti” rusumli xizmat avtomobilida yetib borib, YTHni rasmiylashtirish va ushbu joyda harakat xavfsizligini taʼminlash maqsadida patrul avtomobilini mayoqlarini yoqqan holda qatnov qismining oʻng boʻlagiga joylashtirgan.

Shundan soʻng, 2001-yilda tugʻilgan R.A. “HOWO” rusumli yuk avtomobilini “Toshkent-Olmaliq” yoʻnalishida boshqarib kelib, tajribasizligi hamda eʼtiborsizligi tufayli “Lacetti” rusumli patrul avtomobilini yon qismiga borib urilgan.

YHXB xabariga koʻra, har ikkala holatda ham harakat ishtirokchilarining sogʻligʻiga ziyon yetmagan. Hozirda ikkala yoʻl-transport hodisalari yuzasidan tegishli idoralar tomonidan surishtiruv ishlari olib borilmoqda.