Mineral oʻgʻitlar va boshqa kimyoviy mahsulotlar ishlab chiqaruvchi “Maxam-Chirchiq” AJ faoliyati vaqtincha toʻxtatildi. Bu haqda Oliy sud matbuot xizmati xabar berdi.

Qayd etilishicha, Oʻzbekiston Respublikasi tabiatni muhofaza qilish va tabiiy resurslardan oqilona foydalanishga oid qonun va normativ-huquqiy hujjatlar talablari ijrosini taʼminlanishi yuzasidan “Maxam-Chirchiq” AJ faoliyatida tekshirish oʻtkazilgan. Natijada 11 ta holatda kamchilik aniqlangan.

Jumladan:

• chang-gaz tozalash uskunasining samaradorligi meʼyoriy hujjat talabiga javob bermasligi;

• ifloslantiruvchi moddalar belgilangan meʼyordan ortiq chiqarilayotgani;

• kimyoviy moddalar belgilangan hududda joylashtirilmagani;

• suv tarkibidagi kimyoviy moddalarning ortiqcha chiqarilayotgani;

• kompensatsiya toʻlovlari oʻz vaqtida toʻliq amalga oshirilmagani natijasida amaldagi qonunchilik talablariga rioya qilinmagani aniqlangan.

Shu sababli Ekologiya, atrof-muhitni muhofaza qilish va iqlim oʻzgarishi vazirligi sudga ariza bilan murojaat qilgan va “Maxam-Chirchiq” AJning faoliyatini kamchiliklar bartaraf etilgunga qadar toʻxtatishni soʻragan.

Chirchiq tumanlararo iqtisodiy sudining kecha, 26-noyabrdagi hal qiluv qarori bilan “Maxam-Chirchiq” AJning faoliyati aniqlangan kamchiliklar bartaraf etilgunga qadar toʻxtatilgan.