Foto: Illustrativ

Moliyaviy tahlillarni ulashib boruvchi “Fiskal tahlillar” portalning maʼlum qilishicha, 2024-yilning yanvar-iyun oylarida 138 ming 826 ta tashkilot 13,3 trillion soʻm miqdorda soliq imtiyozlaridan foydalangan.

Maʼlum boʻlishicha, 2 ming 713 ta korxona moliyaviy xizmatlar boʻyicha 9,7 trillion soʻmdan ortiq QQSsiz operatsiyalar amalga oshirgan va 6 ming 404 ta korxona 16 trillion soʻm miqdorida QQS “nol” stavkasini qoʻllagan.

Soliq turlari kesimida foydalanilgan soliq imtiyoz summalari boʻyicha eng katta ulush QQS bilan bogʻliq boʻlib, ushbu davr uchun 6,4 trillion soʻmdan ortiq imtiyoz berilgan. Shuningdek, yer soligʻidan (1,9 trillion), foyda soligʻi (2,4 trillion), ijtimoiy soliq (1,3 trillion) ham soliq imtiyozi foydalanilgan sohalar roʻyxatida yetakchilik qilmoqda.

Bundan tashqari, mol-mulk soligʻini toʻlashda 803 milliard, jismoniy shaxslardan olinadigan daromad soligʻida 544 milliard, aylanmadan olinadigan soliqda 85,2 milliard, suv resurslaridan foydalanganlik uchun soliqda 19,9 milliard soʻmlik imtiyozlar taqdim etilgan.

“Xalqaro ekspertlar xulosasiga asosan, QQS boʻyicha moliyaviy xizmatlar va “nol” stavka hisobi alohida yuritiladi”, deyiladi xabarda.

Avvalroq, savdo sohasidagi korxonalar 6 oyda qancha soliq toʻlagani maʼlum qilingandi.