Oʻzbekiston qovunlarining eksport geografiyasi yil sayin kengaymoqda. Shu bilan birga, endilikda undan olinayotgan mahsulotlar ham xorij bozorlarida sotilmoqda.

Xovos tumanining Oqchangal mahallasi ahli tayyorlayotgan qovunqoqilar Yevropa mamlakatlarigacha yetib borgani ham eʼtiborga molik. Bu natijaga qovunlarining shirinligi bilan bir qatorda undan yuqori sifatli quruq meva, yaʼni qovunqoqini xaridorgir qilib tayyorlashni puxta egallash tufayli erishildi.

Ayni paytda Oqchangalda qovunning poʻchogʻi ham quritilib, chorva uchun toʻyimli ozuqaga aylantirilayotir. Urugʻi esa kosmetika sanoatining noyob xomashyosi sifatida xarid qilinmoqda.

— Qovun yetishtirish va undan qovunqoqi hamda boshqa mahsulotlar tayyorlash aholimizning drayver faoliyat turi hisoblanadi, — deydi mazkur mahalla fuqarolar yigʻini raisi Asatillo Norjigitov. – Dehqonlarimiz koʻp yillardan buyon ushbu poliz ekinini oʻstirib keladi. Shu bois uzoq-yaqinda mahallamiz usta qovunchilar manzili sifatida tanilgan. Kelgusida ayni faoliyatimiz asosida sayyohlik manzillari ham tashkil etish niyatidamiz.

Ahmadali ShERNAZAROV

“Xalq soʻzi”.