Joriy yil 18-noyabr kuni Istanbul shahrida YEXHT Parlament assambleyasi yillik yigʻilishi doirasida Senatning Xalqaro munosabatlar, tashqi iqtisodiy aloqalar, xorijiy investitsiyalar va turizm masalalari qoʻmitasi raisining oʻrinbosari Odiljon Mamatkarimov Shvetsiya Riksdagi “Shimoliy Yevropa–Oʻzbekiston” parlamentlararo hamkorlik guruhi raisi Byorn Syoder bilan uchrashuv oʻtkazdi.

Uchrashuvda Oʻzbekistonning Shvetsiya bilan parlamentlararo aloqalari, qonunchilik, savdo-iqtisodiy, turizm, IT, taʼlim va madaniyat sohalarida hamkorligini rivojlantirish masalalari muhokama qilindi.

Xususan, soʻnggi yillarda ikki mamlakat oʻrtasida parlamentlararo hamkorlik faollashib borayotganligi, jumladan, Oliy Majlis palatalari vakillarining Shvetsiyaga tashriflari muntazam tashkil etilayotganligi, 2025-yilda Shvetsiya parlamenti Spikeri oʻrinbosari Yuliy Kronlidning Oʻzbekistonga tashrifi samarali oʻtkazilgani alohida taʼkidlandi.

Uchrashuv yakunida ikki davlat parlamentlari qoʻmitalari oʻrtasida Barqaror rivojlanish maqsadlarini taʼminlash, gender, ijtimoiy himoya sohalarida, xalqaro tashkilotlar doirasida hamkorlikni yoʻlga qoʻyish, shartnomalar bazasini kengaytirish, oliy taʼlim muassasalari va hududlararo hamkorlikni rivojlantirishga kelishib olindi.