Foto: “Dunyo”

Shri-Lankada huquqbuzarlik sodir etib, vaqtincha saqlash hibsxonasiga joylashtirilgan Oʻzbekiston fuqarosi ortga qaytarildi. Bu haqda “Dunyo” axborot agentligi xabar berdi.

Diplomatik vakolatxona maʼlumotiga koʻra, Shri-Lankadagi vaqtincha saqlash hibsxonasiga joylashtirilgan Oʻzbekiston fuqarosi M.R. yordam soʻrab murojaat yoʻllagan.

Elchixona diplomatlari mazkur murojaatni nazoratga olib, Shri-Lanka Migratsiya boshqarmasi mutasaddilari bilan hamyurtimiz sodir etgan huquqbuzarlik yuzasidan muloqot olib borgan.

Aniqlanishicha, vatandoshimiz Shri-Lankaga turistik viza asosida borgan va kafelardan birida ishlayotgan vaqtida ushlangan. Shri-Lanka qonunchiligiga muvofiq, turistik viza asosida mehnat faoliyati bilan shugʻullanish taqiqlangani sababli u vaqtincha saqlash hibsxonasiga joylashtirilgan.

Shri-Lanka Migratsiya boshqarmasi mutasaddilari bilan olib borilgan muzokaralar natijasida vatandoshimizning Oʻzbekistonga qaytishi boʻyicha kelishuvga erishilgan.

Hamyurtimiz “SriLankan” Airlines samolyoti orqali “Kolombo – Kuala-Lumpur – Toshkent” yoʻnalishi boʻyicha Oʻzbekistonga qaytarilgan.