Foto: Prezident matbuot xizmati

Prezident Shavkat Mirziyoyev kecha, 8-sentyabr kuni amaliy tashrif bilan Qozogʻiston poytaxtiga bordi.

Ostona xalqaro aeroportida Oʻzbekiston rahbarini Qozogʻiston Bosh vaziri Oljas Bektenov va boshqa rasmiy shaxslar kutib oldi.

​

Oʻzbekiston Respublikasi Prezidenti Shavkat Mirziyoyev Ostona shahrida V Butunjahon koʻchmanchilar oʻyinlarining tantanali ochilish marosimida ishtirok etdi.

​

“Ostona arena”da boʻlib oʻtgan tadbirda Qozogʻiston Respublikasi Prezidenti Qasim-Jomart Toqayev, Qirgʻiz Respublikasi Prezidenti Sadir Japarov, Turkman xalqining milliy yetakchisi, Turkmaniston Xalq Maslahati Raisi Gurbanguli Berdimuhamedov, Tatariston Raisi Rustam Minnixanov va boshqa xorijiy mehmonlar ham qatnashdi.

​

Musobaqada dunyoning 90 ga yaqin davlatidan 2 mingdan ortiq sportchi, jumladan, Oʻzbekiston vakillari ishtirok etmoqda. Hamyurtlarimiz kurash, alish, arqon tortish, kamondan oʻq otish, poyga, pahlavonlar bellashuvi kabi yoʻnalishlarda kuch sinashadi.

​

​

Ishtirokchilarga koʻchmanchi xalqlarning boy madaniyati va tarixi, anʼana va urf-odatlariga bagʻishlangan teatrlashtirilgan tomoshasi namoyish etildi.

​

Marosimdan soʻng davlatimiz rahbari Toshkentga joʻnab ketdi. Ostona xalqaro aeroportida oliy martabali mehmonni Qozogʻistonning Bosh vaziri Oljas Bektenov kuzatib qoʻydi.