Oʻzbekiston Respublikasi Prezidenti Shavkat Mirziyoyev 29-iyun kuni Turkman xalqining milliy yetakchisi, Turkmaniston Milliy Kengashi Xalq Maslahati Raisi Gurbanguli Berdimuhamedov bilan telefon orqali muloqot qildi. Bu haqda Prezident matbuot xizmati xabar berdi.

Qayd etilishicha, Oʻzbekiston rahbari Gurbanguli Berdimuhamedovni tavallud kuni bilan samimiy qutlab, unga mustahkam sogʻlik, baxt-saodat va katta muvaffaqiyatlar, qardosh Turkmaniston xalqiga tinchlik-osoyishtalik va ravnaq tilagan.

Milliy yetakchining zamonaviy Turkmanistonni barpo etish va jadal rivojlantirish, mamlakatning xalqaro maydondagi nufuzini oshirish, koʻp qirrali Oʻzbekiston-Turkmaniston doʻstlik, yaxshi qoʻshnichilik va strategik sheriklik munosabatlarini mustahkamlashdagi tarixiy oʻrni alohida qayd etilgan.

Keyingi yillarda ikki tomonlama hamkorlikda erishilgan yutuqlar alohida mamnuniyat bilan qayd etildi. Tovar ayirboshlash hajmi oshmoqda, chegaraoldi savdo zonasi tashkil etilmoqda, muhim qoʻshma iqtisodiy va gumanitar dasturlar amalga oshirilayotgani taʼkidlangan.

Yetakchilar shuningdek, qoʻshma Hukumatlararo komissiyaning boʻlajak yigʻilishida sanoat, transport, energetika, qishloq xoʻjaligi sohalari, hududlararo va madaniy almashinuvni rivojlantirish boʻyicha yangi kooperatsiya loyihalarini ishlab chiqish muhimligini qayd etishgan.

Shu bilan birga, Markaziy Osiyodagi mintaqaviy hamkorlikning dolzarb jihatlari ham koʻrib chiqilgan.