Yurtimizda har yili mehr-oqibat va hamjihatlikni mustahkamlovchi Navroʻz umumxalq bayrami arafasida obodonlashtirish va koʻkalamzorlashtirish ishlari keng koʻlamda olib boriladi.

Ana shu ezgu anʼanalar doirasida Oliy Majlis Senati aʼzolari, Oʻzbekiston Ekologik partiyasi Toshkent shahar partiya tashkiloti Kengashi ijroiya qoʻmitasi xodimlari hamda Ekoharakat faollari ishtirokida “Yurt obodligi, avvalo, mahalladan boshlanadi!” shiori ostida poytaxtimizning Yakkasaroy tumanidagi 26-sonli umumtaʼlim maktabi hududida umumxalq hashari tashkil etildi.

Hashar davomida maktab hududi atrofi tozalanib, tartibga keltirildi, sanitariya holati yaxshilandi. Shuningdek, maktab hududiga mevali va manzarali daraxt koʻchatlari ekildi.

Shu bilan birga, oʻquvchilarni tabiat, oʻsimlik va hayvonot olamini asrashga undovchi, ularga munosabati hamda mehrini oshiruvchi, suv resurslaridan oqilona va samarali foydalanish koʻnikmalarini shakllantiruvchi loyiha bilan tanishildi.

Ishtirokchilar mamlakatimizda atrof muhitni muhofaza qilish ishlarida faol ishtirok etish har birimizning muqaddas burchimiz ekanligini alohida taʼkidlashdi.