Joriy yilning 27-noyabr kuni Oliy Majlis Senatining Byudjet va iqtisodiy masalalar qoʻmitasi raisi Ye. Gadoyev hamda Qoʻmita raisi oʻrinbosari K. Tursunov Qoraqalpogʻistonning Qoraoʻzak tumanida boʻlib, aholi, xotin-qizlar va yoshlar bandligini taʼminlash, ularni qoʻllab-quvvatlash hamda mahalla hayotidagi ijtimoiy faollikni oshirish borasida amalga oshirilayotgan ishlar holatini oʻrgandi

Dastlab senatorlar tumandagi pomidor yetishtirishga ixtisoslashgan issiqxonada boʻlib, ekin parvarishi jarayonlari, yaratilgan mehnat sharoitlari va mavjud ish oʻrinlari boʻyicha mutasaddilardan maʼlumot oldi. Ushbu loyiha xotin-qizlar va yoshlarning mehnatga jalb etilishida muhim ahamiyat kasb etayotgani qayd etildi.

Shundan soʻng senatorlar “Madaniyat” mahallasida boʻlib, mahalla raisi, faollar, xotin-qizlar hamda yoshlar bilan uchrashdi. Uchrashuvda xotin-qizlarning bandligi, ularni kasb-hunar oʻrganishga jalb etish, yoshlar tashabbuslarini qoʻllab-quvvatlash masalalari hamda mavjud muammolarni bartaraf etish yoʻllari muhokama qilindi.

Muloqot yakunida senatorlar mahalla faollari va tuman masʼullariga aholi, xotin-qizlar va yoshlar bandligini taʼminlash, ularning tashabbuslarini qoʻllab-quvvatlash hamda tumanda iqtisodiy imkoniyatlarni kengaytirishga doir oʻz taklif va tavsiyalarini bildirdi.