Rossiya Federatsiyasi qurolli kuchlari safida xizmat qilish yuzasidan shartnomaga imzo chekkan Oʻzbekiston fuqarosi ushbu shartnomani bekor qilishda koʻmak soʻrab Oʻzbekiston Respublikasining Sankt-Peterburg shahridagi Bosh konsulxonasiga murojaat qilgan.

Maʼlum boʻlishicha, Oʻzbekistonning Sankt-Peterburg shahridagi Bosh konsulxonasiga fuqaro “K.M.” farzandi “K.R.” oʻzga shaxsga (Oʻzbekiston fuqarosi) qasddan yengil tan jarohati yetkazish aybi bilan Leningrad viloyati Kolpino shahridagi Tergov hibsxonasida boʻlishi davomida aldov yoʻli bilan RF Qurolli kuchlari safida xizmat qilish yuzasidan shartnomaga imzo chekkanligi hamda uning farzandida ruhiy sogʻligʻi bilan bogʻliq ogʻir buzilishlar borligini inobatga olib, ushbu shartnomani bekor qilishda koʻmak soʻrab murojaat yoʻllagan.

Shundan soʻng, Bosh konsulxona “K.R.”ning huquq va erkinliklarini himoya qilish maqsadida Rossiya Federatsiyasining mutasaddi idoralariga, jumladan Leningrad viloyatidagi Inson huquqlari boʻyicha vakiliga, tegishli tartibda soʻrovnomalar yuborgan.

Natijada, “K.R.”ning RF Qurolli kuchlarida xizmat qilishga qarshiligi inobatga olinib, u bilan harbiy shartnoma tuzilmagan hamda u tergov harakatlarini davom ettirish uchun Kolpino shahridagi Tergov hibsxonasiga qaytarilgan.

Maʼlum qilinishicha, hozirda mavjud jinoyat ishi doirasida olib borilayotgan tergov jarayonlarida fuqaro “K.R.”ning huquq va qonuniy manfaatlarini himoya qilish Bosh konsulxona nazoratiga olingan.