Foto: Samarqand viloyati hokimligi

Aripov Tohir Toʻlqunovich Samarqand viloyati Ichki ishlar boshqarmasi boshligʻi etib tayinlandi. Bu haqda viloyat hokimligi axborot xizmati xabar berdi.

Qayd etilishicha, bugun, 31-iyul kuni viloyat hokimligida Ichki ishlar vaziri Aziz Toshpoʻlatov va Samarqand viloyati hokimi v.b. Adiz Boboyev ishtirokida yigʻilish oʻtkazilgan. Unda tashkiliy masala ham koʻrilgan.

Xususan, Ichki ishlar vazirining tegishli buyrugʻiga koʻra, Aripov Tohir Toʻlqunovich Samarqand viloyati Ichki ishlar boshqarmasi boshligʻi etib tayinlangani maʼlum qilingan. Mazkur tayinlovga qadar Tohir Aripov Toshkent viloyati Ichki ishlar boshqarmasi boshligʻi lavozimida faoliyat koʻrsatgan.

Shuningdek, Ichki ishlar vazirining buyrugʻi bilan Haydarov Neʼmatilla Ibragimovich viloyat IIB boshligʻining birinchi oʻrinbosari etib tayinlangan.

Shuningdek, yigʻilishda Ichki ishlar vaziri Samarqandda jinoyatchilik va huquqbuzarliklarning oldini olish va barvaqt aniqlash, “Xavfsiz mahalla”, “Xavfsiz shahar” tamoyillarini hayotga tatbiq etishda soha xodimlari oldida turgan vazifalarni belgilab bergan.