Joriy yilning 18-noyabr kuni Istanbul shahrida YXHT Parlament assambleyasining yillik yigʻilishi doirasida Senatning Xalqaro munosabatlar, tashqi iqtisodiy aloqalar, xorijiy investitsiyalar va turizm masalalari qoʻmitasi raisining oʻrinbosari Odiljon Mamatkarimov “Ruminiya-Oʻzbekiston” parlamentlararo guruhining raisi, YXHT PA vitse-prezidenti Gabor Hadju bilan uchrashuv oʻtkazdi.

Uchrashuvda ikki mamlakat oʻrtasidagi parlamentlararo aloqalarni mustahkamlash, qonun ijodkorligi faoliyatida oʻzaro tajriba almashish, savdo-iqtisodiy va madaniy hamkorlikni faollashtirish masalalari muhokama qilindi.

Boʻlib oʻtgan uchrashuv davomida Oʻzbekiston — Ruminiya munosabatlarining bugungi holati va rivojlanish istiqbollari, shuningdek, tomonlarning xalqaro tashkilotlar doirasidagi hamkorligi masalalari muhokama qilindi. Savdo-iqtisodiy aloqalarni kengaytirish, oʻzaro savdo hajmlarini koʻpaytirish, qoʻshma investitsiya loyihalarini amalga oshirishga alohida eʼtibor qaratildi.

Uchrashuv yakunida ikki davlat parlamentlari oʻrtasida aloqalarni yanada mustahkamlash hamda muloqot va uchrashuvlar muntazam oʻtkazishga kelishib olindi.