Foto: Reuters

Portugaliya terma jamoasi sardori Krishtianu Ronaldu Saudiya Arabistonining “An-Nasr” klubida oʻynashda davom etishini tasdiqladi. Uning soʻzlarini jurnalist Fabritsio Romano keltirdi.

“Mening kelajagim? Aslida hech narsa oʻzgarmaydi. “Al-Nasr”da qolamanmi? Ha”, — degan futbolchi.

Shu yilning 30-may kuni Ronaldu futbolchilik faoliyatini Saudiya Arabistoni klubida davom ettirishi maʼlum boʻldi. Ommaviy axborot vositalari xabarlariga koʻra, klub va hujum yangi shartnoma imzolagan, ammo uning tafsilotlari oshkor etilmagan.

May oxirida ommaviy axborot vositalarida hujumchi “An-Nasr”ni tark etishi mumkinligi haqida xabarlar tarqalgan edi. Ronalduning oʻzi Saudiya Arabistoni chempionatidagi oxirgi oʻyindan soʻng ketishiga shama qilgan, biroq tomonlar yangi shartnoma borasida kelishib olishdi.

Kecha, 8-iyun kuni Portugaliya finalda Ispaniyani magʻlub etib, Millatlar Ligasining ikkinchi bor gʻolibiga aylandi. Uchrashuvning asosiy vaqti 2:2 hisobidagi durang bilan yakunlandi. Eʼtiborli jihati, portugallar yutqazayotgan vaqtda Ronaldu gol urib, hisobni tenglashtirdi. Ikkinchi boʻlim oxirlarida u jarohat oldi va almashtirildi. Shu bois Ronaldu penaltilar seriyasida ishtirok etmadi. Bunga qaramay uning yurtdoshlari 5:3 hisobida gʻalabaga erishdi.

Oldinroq, Ronaldu ispaniyalik yosh isteʼdod egasi Lamin Yamal haqida oʻz fikrlarini bildirib oʻtgandi.