Foto: Xalq soʻzi

Tadbirkorning huquqlari qonun bilan kafolatlansa va faoliyati davlat tomonidan qoʻllab-quvvatlansa biznesi rivoj topadi, ishida unum, baraka boʻladi.

Prezidentimizning tadbirkorlar bilan ochiq muloqotida bildirilgan   har bir taklifni diqqat bilan tingladim. Davlatimiz rahbari oʻz nutqida faoliyatimizga oid juda koʻplab masalalarga eʼtibor qaratdi. Biznesni qoʻllab-quvvatlash boʻyicha mavjud jamgʻarmalar ish uslubining tubdan oʻzgartirilishi, eksportchi korxonalarni ragʻbatlantirish, soliq va bojxona imtiyozlari, bank kreditlariga oid qulayliklar biz uchun juda muhim yangilik boʻldi. Ochiq muloqotda sohadagi mavjud muammolarni hal qilishga qaratilgan muhim yoʻnalishlar belgilab berildi va bir qator yangi tashabbuslar ilgari surildi. Bu oʻzgarishlar bizning korxonamiz misolida ham iqtisodiy rivojlanish uchun mustahkam zamin yaratadi.

Bugungi kunda korxonamizda tayyorlanayotgan mavsumbop, yuqori sifatli, xushbichim poyabzallarning turi 150 tadan oshib ketdi. Ishlab chiqarish sexlariga Germaniya, Italiya, Turkiya davlatlaridan keltirilgan eng zamonaviy dastgohlar oʻrnatilgan boʻlib, bozor talabidan kelib chiqib har xil assortimentdagi poyabzallar tayyorlanmoqda. Korxonada xalqaro standartlarga muvofiq boʻlgan ISO-9001 sifatni boshqarish tizimi joriy etilgan. Mahsulotlar yuz foiz tabiiy charmdan tayyorlangani tufayli pishiq-puxta, inson salomatligi uchun ham bezarar. Bugungi ochiq muloqotda bildirilgan fikrlar, yaratilayotgan imkoniyatlar bizni yangi loyihalarni amalga oshirish, ishlab chiqarishini yanada kengaytirishga undaydi.

Tadbirkorlar kuni arafasida davlatimiz rahbarining Farmoniga asosan “Shuhrat” medali bilan taqdirlanishim yangi gʻoya va tashabbuslarga ragʻbat berdi. Bunday eʼtibor, bildirilgan ishonch zimmamga yanada katta masʼuliyat yuklab, xalqimiz, Vatanimiz uchun shijoat bilan mehnat qilishga chorlaydi.

Gavharjon JUMANOVA,

Urganch shahridagi “Darital shoes” MCHJ rahbari.