Qoʻqon shahrida aholiga koʻrsatilayotgan raqamli xizmatlar koʻlamini oshirish va axborot texnologiyalaridan samarali foydalanish doimiy eʼtiborda.

Shu maqsadda IT-Park Fargʻona viloyati boʻlimining Qoʻqon filiali tashkil etildi. Bu yerda yoshlarni zamonaviy kasblarga oʻqitish, aholi va tadbirkorlik subyektlarining raqamli xizmatlarga boʻlgan ehtiyojini qondirish borasida ibratli ishlar amalga oshirilmoqda.

— Jahon andozalari darajasida faoliyat koʻrsatuvchi markazda oʻqigan yigit-qizlar yurtimizdagi xorijiy kompaniyalar ofislariga, shu bilan birga, dunyoning brend korxonalariga ishga joylashtiriladi, — deydi IT-Park Qoʻqon filiali loyiha menejeri Alisher Allanazarov. — Ayni paytda markazda 150 nafar barkamol avlod vakillari mehnat bozorida talab yuqori boʻlgan zamonaviy kasblarga oʻqitilmoqda. Xususan, kompyuterda dasturlash, dizayn, ijtimoiy tarmoqlar marketingi, robototexnika, matematika yoʻnalishi shular jumlasidandir.

Markaz tasarrufida bitiruvchi yoshlarning amaliy koʻnikma va tajribasini oshirish uchun istiqbolli loyihalar ishlab chiqish va hayotga tatbiq etish faoliyati ham yoʻlga qoʻyilgan. Bu kelajagimiz vorislariga shu yerning oʻzida ishlab, daromad topish imkonini berayotir.

Oʻz navbatida, markazda taʼlim sifati va samaradorligini oshirish, mutaxassislar xalqaro darajada bilim olishiga erishishi boʻyicha eng muhim ustuvor vazifalar belgilab olingan.

Botir MADIYOROV

“Xalq soʻzi”.