2025-yil 19-noyabr kuni Senatning Xalqaro munosabatlar, tashqi iqtisodiy aloqalar, xorijiy investitsiyalar va turizm masalalari qoʻmitasi majlisida “Oʻzbekiston Respublikasi bilan Vengriya oʻrtasida ushlab berish toʻgʻrisidagi Shartnomani (Budapesht, 2025-yil 20-may) ratifikatsiya qilish haqida” gi Qonun dastlabki tarzda koʻrib chiqildi.

Muhokamada senatorlar, xalq deputatlari mahalliy Kengashlarining doimiy komissiyalari aʼzolari, masʼul vazirlik va idoralar vakillari, huquqshunoslar, ekspertlar hamda ommaviy axborot vositalari xodimlari ishtirok etdi.

Senatorlar oʻz chiqishlarida mazkur Shartnomaning huquqiy ahamiyati, Oʻzbekiston va Vengriya oʻrtasidagi ikki tomonlama munosabatlarni yanada mustahkamlashdagi oʻrni va jinoyatchilikka qarshi kurashishdagi samarasi haqida fikr yuritdi.

Taʼkidlanganidek, mazkur hujjat davlatlar oʻrtasida oʻzaro ishonchni mustahkamlash, jinoyat ishlari boʻyicha hamkorlikni kengaytirish hamda jinoyat sodir etgan shaxslarni ushlab berish va ularni topshirish mexanizmini yanada takomillashtirishga xizmat qiladi.

Muhokama yakunida Qoʻmitaning tegishli qarori qabul qilindi.