Korrupsiyaga qarshi kurashish agentligiga kelib tushgan murojaat asosida Qibray tuman tibbiyot birlashmasi buyurtmachiligida 470,6 mln.soʻmlik issiq ovqat bilan taʼminlash yuzasidan autsorsing xizmati uchun oʻtkazilgan tanlov hujjatlari oʻrganib chiqildi.

Oʻrganish mobaynida tanlovda xarid komissiyasi tomonidan Oʻzbekiston Respublikasi “Davlat xaridlari toʻgʻrisida”gi Qonuni va Vazirlar Mahkamasining 2020-yil 10-yanvardagi 16-sonli qarori bilan tasdiqlangan “Oʻzbekiston Respublikasi Sogʻliqni saqlash vazirligi tuzilmasidagi tashkilotlarda autsorsing xizmatlari koʻrsatish tartibi toʻgʻrisidagi” Nizom talablari buzilganligi aniqlandi.

Bundan tashqari, tanlov 3 nafar komissiya aʼzolarining ishtirokisiz va xabarisiz ularning elektron raqamli imzosidan foydalangan holda sunʼiy ravishda oʻtkazilganligi maʼlum boʻldi.

Mazkur holatlar yuzasidan xarid komissiyasining qarori (yigʻilish bayoni) va shu asosida tanlov gʻolibi bilan tuzilgan shartnomalarni bekor qilish masalasini koʻrib chiqish boʻyicha Qibray tumani tibbiyot birlashmasiga joriy yilning 31-may kuni taqdimnoma kiritildi.

Shuningdek, yuqorida qayd etilgan qonunbuzilish holatlariga huquqiy baho berish uchun toʻplangan hujjatlar Oʻzbekiston Respublikasi Bosh prokuraturasiga yuborildi.

Agentlik taqdimnomasi joriy yilning 3-iyun kuni Qibray tumani tibbiyot birlashmasi xarid komissiyasi tomonidan koʻrib chiqilib, tanlov bayoni va gʻolib bilan tuzilgan shartnomani bekor qilish toʻgʻrisida qaror qabul qilindi.