Qamrov 16 foizdan 65 foizga yetdi

12:55 12 Aprel 2021 Jamiyat
446 0

Romitan tumanidagi “Istiqlol” mahallasida istiqomat qiluvchi yosh oilalarning yana bir orzusi ushaldi. Hududda mahallaning ismi – jismiga monand 240 oʻrinli zamonaviy maktabgacha taʼlim tashkiloti qurilib, foydalanishga topshirildi.

— “Obod qishloq” davlat dasturi asosida bunyod etilgan bunday qulay, shinam maskanda har tomonlama bilimli, intiluvchan, bolajon tarbiyachilar ishlashi kerak, — deydi mazkur 32-sonli davlat maktabgacha taʼlim tashkiloti mudirasi Nodira Murodova. — Shu boisdan tarbiyachilar oʻrtasida tanlovlar oʻtkazyapmiz. Mahoratli, tashabbuskor xodimlarni ragʻbatlantirish tizimi yoʻlga qoʻyilmoqda. Shuningdek, “temir daftar”ga kiritilgan oilalarning farzandlari uchun bogʻcha toʻlovida chegirmalar joriy etilgan.

Aytish joizki, tumanda keyingi yillarda koʻplab maktabgacha taʼlim muassasalari ish boshladi. Bu esa bolajonlarni ushbu maskanlarga jalb etish imkoniyatini kengaytirdi. Bundan 8 yil muqaddam Romitanda jajji oʻgʻil-qizlarning atigi 16 foizi maktabgacha taʼlim muassasalariga qamrab olingan edi. Ayni damda esa bu koʻrsatgich 65 foizga yetdi.

Istam IBROHIMOV,
(“Xalq soʻzi”)

Tavsiya etamiz

Izohlar

Hozircha hech kim fikr bildirmagan. Balki Siz birinchilardan bo'larsiz?