Foto: Bosh prokuratura

Bugun, 11-oktyabr kuni Bosh prokuraturada “Sunʼiy intellekt imkoniyatlarini prokuratura tizimiga joriy qilish” mavzusida davra suhbati oʻtkazildi. Bu haqda Bosh prokuratura matbuot kotibi Hayot Shamsutdinov xabar berdi.

Bildirilishicha, tadbirda Bosh prokuratura, Huquqni muhofaza qilish akademiyasi, Qoraqalpogʻiston Respublikasi, viloyatlar va Toshkent shahar, Oʻzbekiston Respublikasi Harbiy va Transport prokuraturasi, Bosh prokuratura huzuridagi Departamentning masʼul xodimlari ishtirok etdi.

Tadbirda Oʻzbekiston Milliy media birlashmasi Boshqaruvi raisi, Oʻzbekiston jurnalistika va ommaviy kommunikatsiyalar universiteti rektori, professor Sherzodxon Qudratxoʻja, “AIM Laboratory” MCHJ rahbari Xikmatilla Ubaydullayev, “XCDM” MCHJ rahbari Samandar Tursunaliyev, texnobloger Sadulla Abdullayevlar ishtirok etib, bugungi mavzu yuzasidan nutq soʻzladi.

Soʻzga chiqqanlar sunʼiy intellekt texnologiyalarini jadal joriy etish va ularni mamlakatimizda keng qoʻllash, raqamli maʼlumotlardan foydalanish imkoniyatini va ularning yuqori sifatini taʼminlash, ushbu sohada malakali kadrlar tayyorlash uchun qulay shart-sharoitlar yaratish borasida oʻz fikr va maʼlumotlarni, tushuntirishlarni berib oʻtishdi.