“Muvofiqlikni baholash organlarini akkreditatsiya qilish toʻgʻrisida”gi qonun (OʻRQ–820, 27.02.2023-y.) Prezident tomonidan imzolandi.

Qonunga koʻra, Vazirlar Mahkamasi akkreditatsiya sohasida yagona davlat siyosati amalga oshirilishini taʼminlaydi.

Oʻzbekiston texnik jihatdan tartibga solish agentligi akkreditatsiya sohasidagi maxsus vakolatli davlat boshqaruvi organi hisoblanadi.

Milliy akkreditatsiya tizimi muvofiqlikni baholash organlarini akkreditatsiya qilish qoidalarini va tartib-taomilini belgilaydigan normativ-huquqiy hujjatlarga, shuningdek texnik jihatdan tartibga solish sohasidagi normativ hujjatlarga muvofiq davlat miqyosida faoliyat koʻrsatuvchi tizimdir.

Milliy akkreditatsiya tizimi ishtirokchilari quyidagilardan iborat:

— maxsus vakolatli davlat organi;

— akkreditatsiya boʻyicha kengash;

— akkreditatsiya organi;

— akkreditatsiya qilingan subyektlar;

— akkreditatsiya boʻyicha baholovchilar va texnik ekspertlar;

— akkreditatsiya boʻyicha texnik qoʻmitalar.

Akkreditatsiya, agar akkreditatsiyaning amal qilishi tugatilmagan boʻlsa, guvohnomada koʻrsatilgan muddat davomida amal qiladi.

Qonun rasmiy eʼlon qilingan kundan eʼtiboran 6 oy oʻtgach kuchga kiradi.