Illyustrativ foto

Rossiya prezidentining matbuot kotibi Dmitriy Peskov Rossiya prezidenti Vladimir Putin Ukraina boʻyicha muloqot va muzokaralarga tayyorligini maʼlum qildi.

“Prezident haqiqatan ham bir necha bor, toʻgʻrirogʻi, doimiy ravishda muloqot va muzokaralarga tayyor ekanini taʼkidlagan”, — dedi Peskov jurnalistlarga Putinning muzokaralarga tayyorligi haqidagi xabarlarni izohlar ekan.

Shu yilning iyun oyida Putin Ukrainadagi mojaroni tinch yoʻl bilan hal qilish tashabbuslari bilan chiqqan edi. Unga koʻra, Moskva zudlik bilan oʻt ochishni toʻxtatadi va Ukraina qoʻshinlari Rossiyaning yangi hududlari hududidan olib chiqib ketilgandan soʻng muzokaralarga tayyorligini eʼlon qiladi. Bundan tashqari, Rossiya rahbarining qoʻshimcha qilishicha, Kiyev NATOga qoʻshilish niyatidan voz kechishini eʼlon qilishi, demilitarizatsiya va denasifikatsiyani amalga oshirishi, shuningdek, neytral, qoʻshilmaslik va yadrosiz maqomni qabul qilishi kerak. Putin shu doirada Rossiya Federatsiyasiga qarshi sanksiyalarning bekor qilinishini ham tilga olgandi.

Ukraina Qurolli kuchlarining Kursk viloyatiga qilgan teraktidan soʻng Putin “tinch aholiga, fuqarolik infratuzilmasiga begʻaraz zarba berganlar yoki atom energetika obyektlariga tahdid yaratishga urinayotganlar” bilan muzokara olib borishning iloji yoʻqligini aytgandi.

Keyinroq Rossiya prezidenti yordamchisi Yuriy Ushakov Rossiya davlati rahbari tomonidan ilgari bildirilgan Ukrainani tartibga solish boʻyicha Moskvaning tinchlik takliflari bekor qilinmaganini, ammo hozirgi bosqichda “bu sarguzasht”ni hisobga olgan holda Rossiya Ukraina bilan gaplashmasligini aytgandi.

Rossiya Ukrainaga qurol yetkazib berish mojaroni hal qilishga xalaqit beradi va unga NATO davlatlarini bevosita jalb qiladi, deb hisoblaydi. Oʻz navbatida, Rossiya tashqi ishlar vaziri Sergey Lavrov avvalroq Ukraina uchun qurol boʻlgan har qanday yuk Rossiya uchun qonuniy nishonga aylanishini taʼkidlagandi. Uning soʻzlariga koʻra, AQSH va NATO mojaroda bevosita, jumladan, nafaqat qurol-yarogʻ yetkazib berish, balki Buyuk Britaniya, Germaniya, Italiya va boshqa mamlakatlarda kadrlar tayyorlash orqali ham ishtirok etmoqda.