Ijtimoiy tarmoqlarda oʻzbekistonlik tennischi Temur Ismoilovning kelishilgan oʻyinlarda ishtirok etgani uchun 7 yilga sportdan chetlatilgani haqida xabarlar eʼlon qilindi.

Mazkur holat yuzasidan Oʻzbekiston Respublikasi Jismoniy tarbiya va sport vazirligi hamda Milliy Olimpiya qoʻmitasi quyidagilarni maʼlum qildi:

Temur Chingizovich Ismoilov 1995-yil 14-yanvarda tugʻilgan. 2013-yildan to 2017-yilgacha Oʻzbekiston terma jamoasi sharafini himoya qilgan. Oʻsha yili oilasi bilan birga doimiy yashash uchun AQSHga koʻchib ketganligi sababli terma jamoa safidan chiqarilgan.

T.Ismoilov haligacha AQSH fuqaroligini olmagani bois bugungacha Xalqaro tennis federatsiyasi (ITF) hamda professional tennischilar assotsiatsiyasi (ATR) tasnifiga kiruvchi musobaqalarda Oʻzbekiston bayrogʻi ostida qatnashib kelgan.

Bugun, 2020-yil 23-dekabr kuni tennis oʻyinlarini tekshirishga masʼul boʻlgan Tennis Integrity Unit tashkiloti T.Ismoilovning ITF hamda ATR tasnifidagi turnirlarda kelishilgan oʻyinlarda ishtirok etgani uchun 7 yilga sportdan chetlatilgani haqidagi qarorini matbuotda eʼlon qildi.

Ayni paytda Temur Ismoilov tennis boʻyicha Oʻzbekiston terma jamoasi aʼzosi sifatida roʻyxatda turmasligini maʼlum qilamiz.