Prezidentimizning tegishli qarorlari ijrosi doirasida Milliy gvardiya qoʻmondonligi tashabbusi bilan mamlakatimizda ot sporti turlaridan biri boʻlmish — «Tentpegging» sportini ham rivojlantirish, aholi, ayniqsa, yoshlarni va harbiy xizmatchilarni ushbu sport turiga keng jalb qilish maqsadida Oʻzbekiston «Tentpegging» federatsiyasi faoliyati yoʻlga qoʻyildi.

Oʻzbekiston «Tentpegging» federatsiyasining raisi Milliy gvardiya huzuridagi ot sporti boʻyicha Respublika oliy sport mahorati maktabi direktori N. Ibragimov va federatsiya raisining oʻrinbosari lavozimiga esa Yoshlar oʻrtasida harbiy-vatanparvarlik va sport ishlarini tashkillashtirish boshqarmasi boshligʻi Q. Azizov saylandi.

«Tentpegging» sport turini keng targʻib qilish va rivojlantirish, ushbu sport turi boʻyicha respublikamiz boʻylab nufuzli musobaqalarni tashkil etish, shuningdek, Jahon va Osiyo mamlakatlari oʻrtasida oʻtkaziladigan musobaqalarda yuqori natijalarni qoʻlga kiritish, Milliy merosimiz namunasi boʻlgan “Qorabayir” zotli otlarni ushbu sport orqali dunyoga tanitish yuzasidan aniq vazifalar belgilab olindi.

«Tentpegging» sport turi Osiyo va Yevropa davlatlarida juda ommabop boʻlib, ayniqsa, harbiy xizmatchilarning jismoniy va jangovar tayyorgarligini mustahkamlashda muhim ahamiyat kasb etadi.