Xalq deputatlari Toshkent shahri Kengashining navbatdan tashqari sessiyasi boʻlib oʻtmoqda. Unda Prezident Shavkat Mirziyoyev ishtirok etmoqda.

Sessiyada tashkiliy masala koʻrib chiqildi.

Prezident Toshkent shahri hokimi lavozimiga hokim vazifasini bajarib kelayotgan Shavkat Boʻronovich Umurzoqov nomzodini tavsiya etdi.

Shahar hokimini tayinlash masalasi ovozga qoʻyildi. Ovoz berish natijalariga koʻra, Shavkat Umurzoqov Toshkent shahri hokimi etib tasdiqlandi.

Davlatimiz rahbari xalq vakillari bildirgan bu yuksak ishonch yangi hokimdan katta masʼuliyat, tinimsiz mehnat va fidoyilikni talab qilishini taʼkidladi.

Yangi hokim oʻz oʻrinbosarlari, tuman hokimlari, sektor va bank rahbarlari, “mahalla yettiligi” bilan poytaxt aholisi uchun munosib sharoit yaratish, investitsiya olib kelib, yangi-yangi yuqori daromadli ish oʻrinlarini koʻpaytirish, shaharni yanada obod qilish, bir soʻz bilan aytganda, odamlar rozi boʻlishi uchun yangicha yondashuv asosida katta marralarni olib, qattiq ishlashi kerakligi koʻrsatib oʻtildi.

Shuningdek, Shavkat Mirziyoyev Toshkent shahar hokimi etib tasdiqlangan Shavkat Boʻronovich Umrzoqov haqida shunday taʼkidladi:

“…Toshkentga hokim qoʻyish oson emas. 1 yil oldin Shavkat Boʻronovich Umrzoqovga ishonch bildirgandik. Oʻtgan vaqt davomida u ham oʻrgandi, tajriba toʻpladi. Mahallalarni rivojlantirish uchun faqat byudjetga tayanmay, qoʻshimcha imkoniyatlarni ishga sola bilyapti. Oʻylaymanki, azim poytaxtimizning biri ikki boʻlishiga harakat qiladi.”