Foto: “Getty Images”

Rossiyadagi Tula davlat universiteti (TulDU) olimlari tabiiy ravishda parchalanadigan yangi turdagi polimerni yaratdi. Bu haqda “Journal of Polymers and the Environment” jurnalida eʼlon qilingan maqolada maʼlum qilindi.

Hozirda maishiy va sanoat ehtiyojlari uchun ishlatiladigan koʻpgina oʻramalar neft mahsulotlariga asoslangan polimerlardan tayyorlanadi. Ammo olimlar foydali qazilmalar zaxirasi kamayib borayotgani sababli insoniyat kelasi asrda xomashyo yetishmovchiligi bilan toʻqnashishi mumkinligidan ogohlantirmoqda.

Tula universiteti mutaxassislari esa yogʻoch biomassasi va qishloq xoʻjaligi chiqindilaridan yangi turdagi biopolimerni ishlab chiqdi. U 300 darajagacha boʻlgan haroratga chidamli boʻlib, tabiatda mikroplastik qoldirmasdan parchalanish qobiliyatiga ega.

TulDU laboratoriyasi mudiri Bogdan Karlinskiyning taʼkidlashicha, polimer “klik-kimyo” usuli orqali yaratilgan boʻlib, bu yoʻnalish Nobel mukofoti bilan eʼtirof etilgan zamonaviy organik sintez usuli hisoblanadi. Uning fikricha, bunday tadqiqotlar kelajakda uglerod neytralligiga erishish va qayta tiklanmaydigan resurslar tanqisligi sababli yuzaga kelishi mumkin boʻlgan ekologik inqirozlarni oldini olishga yordam beradi.