Foto: Xalq so‘zi

Nukus shahridagi amfiteatrda Oʻzbekiston Respublikasi mustaqilligining 31 yilligiga bagʻishlangan “Yangi Oʻzbekistonda el aziz, inson aziz” shiori ostida bayram tantanasi boʻlib oʻtdi.

Tadbirni Qoraqalpogʻiston Respublikasi Joʻqorgʻi Kengesi Raisi Amanbay Orыnbayev kirish soʻz bilan ochdi va xalqimizni eng qutlugʻ bayram bilan samimiy qutladi.

Joʻqorgʻi Kenges Raisi tabrik soʻzida barcha jabhada yuz berayotgan oʻzgarish va yangilanishlar, xalqimiz manfaati yoʻlida qilinayotgan keng qamrovli ishlar xususida toʻxtalib, Prezidentimiz tomonidan aholini ijtimoiy himoya qilish tizimini takomillashtirish sohasida belgilab berilgan vazifalarga urgʻu berdi.

Xususan, endilikda ijtimoiy himoya reyestriga kiritilgan oilalarga koʻmir, suyultirilgan gaz, oziq-ovqat va boshqa zarurat uchun 600 ming soʻmdan bir martalik yordam puli ajratiladi. Shuningdek, 15-sentyabrdan boshlab Qoraqalpogʻiston Respublikasida pensiya va nafaqa oluvchilar, nogironligi boʻlgan shaxslarga temir yoʻl va avia bilet sotib olish uchun 50 foiz chegirmalar tiklanadi.

2025-yilgacha qoʻshilgan soligʻi boʻyicha rejadan ortib bajarilgan tushumlar Qoraqalpogʻistonning byudjetida qoldiriladi.

Bayramda sanʼatkorlarning doʻstlik, millatlararo totuvlik, milliy anʼanalarni, vatanparvarlik va tinchlikni ulugʻlovchi kuy-qoʻshiqlari barchaga xush kayfiyat bagʻishladi.

Nukus shahri va Orolboʻyidagi olis ovullarda bayram tantanalari davom etmoqda.

Gʻ. Otajonov, “Xalq soʻzi”.