Illustrativ foto

Prezidentimiz boshchiligida ftiziatriya va pulmonologiya sohasini rivojlantirish, OIT kasalligining oldini olish masalalari boʻyicha yigʻilish oʻtkazilgani haqida xabar bergandik.

Unda davlatimiz rahbarining 2019-yil 13-fevraldagi qarori bilan ftiziatriya va pulmonologiya yordami koʻrsatish tizimini takomillashtirish boʻyicha qabul qilingan chora-tadbirlar sezilarli natija bergani qayd etildi.

Jumladan, yurtimizda:kasallanganlar umumiy soni 2 mingtaga, yangi xastalanish koʻrsatkichlari 10 foizga, oʻlim holatlari 17 foizga kamaydi.

Lekin soʻnggi yillarda koronavirus epidemiyasi sababli yurtimizda oʻpka kasalliklari boʻyicha dispanser nazoratidagi bemorlar soni 18 foizga oshgan.

Hududlarda tuberkulyoz boʻyicha 5 xil yuqori texnologik jarrohlik amaliyotiga talab boʻlsada, bu xizmatlar faqat Toshkent va Nukus shaharlarida toʻliq yoʻlga qoʻyilgan.

Odam immuniteti tanqisligi virusi bilan kasallanish holatlari ham, afsuski, koʻpaymoqda. Bu, ayniqsa, Toshkent shahri, Andijon va Samarqand viloyatlarida dolzarb.

Shu bois yigʻilishda mazkur ikki sohadagi navbatdagi chora-tadbirlar mutaxassislar ishtirokida muhokama qilindi.