Ahmadali ShERNAZAROV/“Xalq soʻzi”. “Yashil makon” umummilliy loyihasi doirasida “Obod xonadon – obod koʻcha – obod mahalla” tamoyillari asosida tashkil etilgan tanlovning tuman-shahar bosqichlarida viloyatdagi 239 ta mahalla, 700 nafardan ortiq koʻchaboshi, 1200 nafarga yaqin xonadon egasi ishtirok etdi. Koʻrik-tanlov mahalladagi obodlik va farovonlikni taʼminlash, aholi daromadini oshirish, milliy qadriyat hisoblangan qoʻni-qoʻshnichilik munosabatlarini yanada mustahkamlash maqsadida tashkil etilgan.

— Ushbu tanlov mahalla faollari hamda fuqarolarning hamjihatlikda ish olib borishida muhim omil boʻlmoqda, — deydi Oʻzbekiston mahallalari uyushmasi Sirdaryo viloyati boshqarmasi boshligʻi Uygʻun Xatamov. — Shuningdek, yoshlarning milliy qadriyatlar ruhiyatida kamol topishida ham katta ahamiyat kasb etayotir.

Tanlovning uch yoʻnalish boʻyicha viloyat bosqichidagi oʻzaro bellashuvning yakuniy natijalarga koʻra birinchi oʻrin Shirin shahrining Vatanparvar mahallasi, uning “Xalqlar doʻstligi” koʻchasi hamda mazkur mahalladagi namunali xonadon egasi Dilfuza Qurbonovaga nasib etdi.