AQSH prezidenti Donald Tramp maʼmuriyati Kuba yetakchisi Migel Dias-Kanelning lavozimidan ketishiga erishish niyatida. Bu haqda The New York Times nashri oʻz manbalariga tayanib xabar bermoqda.

Nashr suhbatdoshlarining taʼkidlashicha, Vashington hozircha Kuba hukumatining toʻliq isteʼfosini talab qilmayapti, balki asosiy eʼtiborni shaxsan prezident Migel Dias-Kanelni almashtirishga qaratgan.

Amerikalik mulozimlarning fikricha, amaldagi prezident lavozimidan ketsa, Kubada chuqur tarkibiy iqtisodiy islohotlarni amalga oshirish imkoniyati tugʻiladi. Dias-Kanelning oʻzi esa bunday keskin oʻzgarishlarni qoʻllab-quvvatlashiga AQSH ishonmayapti.

Xabarda aytilishicha, Kubaning yangi rahbari roliga eng ehtimolli nomzod sifatida Raul Kastroning nabirasi — Raul Gilyermo Rodriges Kastro koʻrilmoqda. U allaqachon muzokaralar jarayonida ishtirok etayotgani aytilmoqda.

Maʼlumot uchun: Kuba hozirda soʻnggi oʻn yilliklardagi eng ogʻir energetik va iqtisodiy inqirozni boshdan kechirmoqda. Mamlakatda yonilgʻi tanqisligi sababli elektr taʼminotida tez-tez uzilishlar (blekautlar) kuzatilmoqda.