Oʻzbekistonlik aralash yakka kurash ustasi Nursulton Roʻziboyevning navbatdagi UFC jangiga oid maʼlumotlar eʼlon qilindi. 31 yoshli hamyurtimiz 17-may kuni AQSHning Las-Vegas shahrida joylashgan “UFC Apex” majmuasida boʻlib oʻtadigan “UFC Fight Night” turniri doirasida oktagonga koʻtariladi. Bu haqda mashhur insayder Aleks Beunin oʻzining X tarmogʻidagi sahifasida xabar berdi.

Maʼlumotlarga koʻra, Roʻziboyevning raqibi amerikalik sportchi Dastin Stolsfus boʻladi. Jang oʻrta vazn toifasida tashkil etilishi kutilmoqda. Qayd etish joizki, Nursulton soʻnggi jangini ham aynan shu vaznda oʻtkazgan edi va unda gʻalaba qozongandi.

Bu jang Nursulton Roʻziboyev uchun UFC doirasidagi beshinchi jang boʻladi. U bugungi kungacha ushbu Ligada 4 ta jang oʻtkazgan va ularning uchtasida gʻalaba qozonib, bir bor magʻlub boʻlgan. Umumiy professional faoliyati davomida esa 35 ta gʻalaba, 9 ta magʻlubiyat va 2 ta durang natijasini qayd etgan.

Uning raqibi, 33 yoshli Dastin Stolsfus esa professional faoliyati davomida 16 ta gʻalaba va 6 ta magʻlubiyatga ega. Uning UFCdagi natijalari 3 ta gʻalaba va 5 ta magʻlubiyatni tashkil etadi. Bu jang har ikki sportchi uchun ham muhim ahamiyatga ega boʻlib, reytingda yuqori pogʻonalarga koʻtarilish imkonini yaratadi.